Heilsu- og forvarnarvika Reykjanesbæjar

Dagana 28. september – 4. október er heilsu- og forvarnarvika hjá Reykjanesbæ og mun Háaleitisskóli taka þar virkan þátt. 

 

Göngum í skólann

Skólinn er skráður í verkefnið „Göngum í skólann“ og verður aukin áhersla lögð á það verkefni í vikunni, eru allir nemendur hvattir til að nýta sér virkan ferðamáta í og úr skólanum. 

 

Morgunmatur

Háaleitisskóli mun bjóða öllum nemendum hafragraut í morgunmat, fyrir fyrstu kennslustund. Boðið verður upp á hafragrautinn á sal skólans frá klukkan 07:40 – 08:05.

 

Hollt og gott nesti

Nemendur eru hvattir til að koma með ávexti og/eða grænmeti til viðbótar við nestið sitt í vikunni.

 

Vettvangsferðir

Nemendur munu fara í styttri göngu-/vettvangsferðir með umsjónarkennara.

 

Útileikir

Nemendur fara í útileiki undir stjórn íþróttakennara auk þess sem nemendur í 7. bekk munu hafa umsjón með útileikjum í fyrri frímínútum.

 

Heilbrigði og velferð

Nemendur munu vinna verkefni þar sem grunnþættirnir heilbrigði og velferð eru höfð að leiðarljósi.

 

Lögreglan með fræðslu

Kristján Freyr Geirsson, lögreglumaður, kemur í skólann þriðjudaginn 29. september og ræðir við nemendur í öllum bekkjum m.a. um öryggi í umferðinni, útivistartímann og aðrar mikilvægar reglur.

 

Maritasfræðsla

Magnús Stefánsson, Snædís Birta Ásgeirsdóttir og Páll Óskar Hjálmtýsson verða með erindi sem kallast „Þolandi og gerandi eineltis – frá sjónarhorni beggja“ á sal skólans þriðjudaginn 29. september klukkan 17:00. Erindið er hugsað fyrir nemendur í 4. – 7. bekk ásamt foreldrum/forráðamönnum. Aðrir eru einnig velkomnir. 

Auglýsing vegna erindisins: https://tackk.com/1568qs

 

Jákvæð og örugg netnotkun

Hafþór Barði Birgisson, íþrótta- og tómstundafulltrúi, verður með erindi á sal skólans föstudaginn 2. október klukkan 08:10 um jákvæða og örugga netnotkun. Erindið er ætlað nemendum í 4. – 7. bekk ásamt foreldrum/forráðamönnum.

 

Við hvetjum foreldra/forráðamenn til að taka virkan þátt í heilsu- og forvarnarvikunni með okkur.