Verðlaun í friðarveggspjaldakeppni

Nýlega fékk Ólafur Fenrir Viktorsson nemandi í 7. bekk skólans verðlaun í friðarveggspjaldakeppni hjá Lions.  Þetta er alþjóðleg keppni og var þemað í ár  „Friður án takmarka“.  Myndin hans Ólafs er mynd af jörðinni og hvítri dúfu.  Ólafur fékk viðurkenningaskjal og peningaverðlaun.  Þessi verðlaun veita honum tækifæri til að komast í undankeppnina hér á landi um það hvaða verk fer í aðalkeppnina.

 Friðarveggspjaldakeppnin var fyrst haldin 1988 og markmiðið er að gefa grunnskólanemendum tækifæri til að koma á framfæri á skapandi hátt hugmyndum sínum varðandi heimsfrið og miðla framtíðarsýn sinni til umheimsins. Um það bil 600.000 börn frá 75 löndum taka þátt í keppninni árlega. Lions á Íslandi styrkir keppnina og er hún opin grunnskólabörnum á aldrinum 11 - 13 ára.

Hvert ár er valið þema til að vekja ímyndunarafl nemendanna. Tjáning, listrænt gildi og frumleiki eru þau þrjú viðmið sem notuð eru til að meta veggspjöldin á öllum dómstigum.